Қазақстан футбол федерациясының басшысы Марат Омаров «Qazsport» телеарнасына берген сұхбатында еліміздің 2027 жылы УЕФА Суперкубогы немесе Конференциялар лигасының финалын өткізу үшін ресми өтініш бергенін айтты, деп жазады Sport-24.kz KFF.kz-ке сілтеме жасап.
Оның айтуынша, УЕФА президенті Александр Чефериннің Қазақстанға жасаған алғашқы сапары мен Мемлекет басшысы Қасым-Жомарт Тоқаевпен кездесуінен кейін ел футболына жаңа мүмкіндіктер ашыла бастады.
– Чеферин мырзамен мазмұнды әңгіме өрбіді. Біз 2027 жылы УЕФА Конгресін өткізуге дайын екенімізді жеткіздік. Сонымен бірге Астана немесе Алматы қалаларында Суперкубок немесе Конференциялар лигасының финалын ұйымдастыру жөнінде өтініш жолдадық, – деді Омаров.
Сондай-ақ елімізде қазіргі уақытта футбол инфрақұрылымы дамып, жаңа стадиондар салынып жатқанын және U-21 мен U-19 Еуропа чемпионаттарын өткізу жоспары да бар екенін атап өтті.
