Қазақстан құрамасы 2026 жылғы әлем чемпионатының іріктеу турниріндегі кезекті матчында Солтүстік Македония ұлттық құрамасынан жеңіліп қалды, деп хабарлайды Sport-24.kz.
J тобындағы кездесу Астанадағы “Астана Арена” стадионында өтті.
Ойын қонақтардың 1:0 есебі жеңісімен аяқталды. Жалғыз голды 33-минутта Александр Трайковски соқты — ол Мұхаммеджан Сейсеннің қақпасына допты бірден бағыттап жіберді.
Айта кетейік, Қазақстан құрамасы бірнеше қауіпті сәттерге ие болды. Соның ішінде үш рет қақпа бағанасы мен көлденең тірегіне соққы жасалды: 16-минутта Ғалымжан Кенжебек бағанаға дәлдеп соқты, 57-минутта Максим Самородов допты қақпаның үстіңгі тірегіне соқты, ал 85-минутта алаңға ауысып шыққан Дастан Сатпаев та бағанаға соқты.
Сондай-ақ Ислам Чесноков, Нұралы Әліп және өзге ойыншылар да бірнеше сәттерді пайдалана алмады. Өкінішке қарай, олардың күш-жігері нәтижесіз болды.
Еске салайық, Қазақстан құрамасы 4 қыркүйекте өз алаңында Уэльс құрамасын қабылдайды.
Айта кетсек, іріктеу кезеңінің алғашқы турында Қазақстан құрамасы Уэльс құрамасынан сырт алаңда 1:3 есебімен жеңіліп қалса, екінші турда Лихтенштейн құрамасын сырт алаңда 2:0 есебімен жеңген болатын.
